სტრესულმა სამუშაო გარემომ და ყოველდღიურმა დაღლილობამ შეიძლება ნერვულ აშლილობამდეც მიგვიყვანოს. სტრესული გარემო ასევე ვნებს ჩვენს ყველაზე მნიშვნელოვან ორგანოს–გულს. საქართველოში ხშირია გულ–სისხლძარღვთა დაავადებები. ბოლო დროს კი მოხშირდა გულის შეტევები. ქვემოთ ვნახავთ, თუ როგორ უნდა მივხვდეთ იმას, რომ გულის შეტევა გვაქვს, და როგორ გადავირჩინოთ თავი.

გულის შეტევის ყველაზე გავრცელებული სიმპტომებია:

მოჭერის, ზეწოლის ან შებოჭვის შეგრძნება და ტკივილი მკერდის ძვლის უკან, რაც რამდენიმე წუთს გრძელდება;
ტკივილი, რომელიც გულმკერდიდან ვრცელდება ბეჭების, მხრების, ზურგის, ზოგ შემთხვევაში - ქვედა ყბისა და კბილებისკენ;
გულში ტკივილის ეპიზოდების გახშირება;
გახანგრძლივებული ტკივილი მუცლის ზედა ნაწილში;
ქოშინი;
ოფლიანობა;
სიკვდილის შიში;
გულის წასვლის შეგრძნება;
გულისრევა და ღებინება.

სპეციალისტები აღნიშნავენ, რომ ქალებში გულის შეტევა შესაძლოა განსხვავებული სიმპტომებით წარიმართოს. ზემოთ ჩამოთვლილი ნიშნების გარდა, მოსალოდნელია:

მუცლის ტკივილი ან გულძმარვა;
ცივი ოფლი;
თავბრუხვევა;
უჩვეულო და ერთი შეხედვით უმიზეზო სისუსტე.

დადგენილია, რომ გულის შეტევის დროს გარდაცვლილთა დაახლოებით ნახევარი შეტევის დაწყებიდან პირველ საათში კვდება. ნუ დატოვებთ გულის შეტევის სიმპტომებს უყურადღებოდ, მით უფრო, თუ მათი ხანგრძლივობა 5 წუთს აღემატება. დაუყოვნებლივ გამოიძახეთ სასწრაფო დახმარება ან მიმართეთ უახლოეს კარდიოლოგიურ კლინიკას.скачать dle 11.3