მორჩა! რეალი ისევ ჩემპიონია!!!
მადრიდის რეალმა ისტორია დაწერა! "სამეფო გუნდმა" ჩემპიონთა ლიგა ზედიზედ მესამედ მოიგო! ვულოცავთ მადრიდელთა ყველა გულშემატკივარს ამ გრანდიოზულ მიღწევას! რეალისთვის ეს მე-13 ჩემპიონთა თასია!

გუშინ, კიევის ოლიმპიურ სტადიონზე ჩემპიონთა ლიგის ფინალი იყო . მადრიდის რეალს თასის მოგება ზედიზედ მესამედ შეეძლო (სულ 12)! ლივერპულს თასი 5-ჯერ აქვს მოგებული.

დავიწყოთ იმ ნიუსებით, რომლებიც ჯერ კიდევ თამაშამდე გავრცელდა.

სასტარტო შემადგენლობა
რეალი (4-1-2-1-2)
► ნავასი - კარვახალი, ვარანი, სერხიო რამოსი, მარსელო - კაზემირო - მოდრიჩი, კროოსი - ისკო - ბენზემა, რონალდო.

სასტარტო შემადგენლობა
ლივერპული (4-1-2-3)
► კარიუსი - ალექსანდერ-არნოლდი, ლოვრენი, ვან დაიკი, რობერტსონი - ჰენდერსონი - მილნერი, ვეინალდუმი - სალაჰი, რობერტო ფირმინო, მანე


რა თქვა კლოპმა მატჩის წინ?
იურგენ კლოპი
“საოცარი გზა გავიარეთ და ზუსტად ისე დავიმსახურეთ ფინალი, როგორც რეალმა. დიახ, ისინი სამჯერ გავიდნენ ფინალში, რაც უპირატესობაა, მაგრამ გახსოვდეთ, ეს ფეხბურთია.”

დევიდ ბექჰემი დღევანდელ ფინალში რეალს უქომაგებს!
ბექზი: “მინდა ზიზუს, პრეზიდენტს და კლუბს ჩემპიონთა ლიგის ფინალში წარმატება ვუსურვო. და გთხოვთ დაამარცხეთ ლივერპული

ზინედინ ზიდანი
“ეს ჩემპიონთა ლიგაა და ჩვენ ფინალში ზედიზედ მესამედ ვართ! თქვენ მეუბნებით, რომ მოწინააღმდეგეს უფრო მეტად უნდა ამ თასის მოგება... როგორ მიბედავთ ამის თქმას? ამ თასის მოგება ძალიან მინდა და ამაში ეჭვი არ შეგეპაროთ!

რა თქვა სალაჰმა მატჩის წინ?
მოჰამედ სალაჰი
“არ აქვს მნიშვნელობა, რამდენჯერ მოიგო რეალმა ლიგა ბოლო წლებში. მოედანზე 11x11 ვიქნებით და მინიმუმ 90 წუთი გვექნება - მაგ დროს რეალის მუზეუმზე ნაღდად არ ვიფიქრებ!

სალაჰი და რამადანი
სალაჰი მუსულმანური წესის შესაბამისად, რამადანის მარხვას არ არღვევს და განთიადიდან მზის ჩასვლამდე არც საკვებს ეკარება და არც წყალს. ეგვიპტელმა მატჩის დღესაც 18 საათის განმალობაში იმარხულა და მხოლოდ თამაშის დაწყებამდე საათნახევრით ადრე შეეძლო საკვების მიღება


მწვრთნელების ცოლები
გუნდების მთავარი მწვრთნელების მეუღლეებიც სტადიონზე არიან - ულა ზანდროკი (კლოპის) და ვერონიკ ზიდანი.

კრიშტიანო რონალდო
“ფინალი ყოველთვის განსაკუთრებული მოვლენაა. სწორედ ფინალებში იმართება მატჩები, რომლებიც მერე არასდროს არავის ავიწყდება.

ისტორიული ფაქტი
ლივერპულელი ტრენტ ალექსანდერ-არნოლდი ჩემპიონთა ლიგის ისტორიაში პირველი თინეიჯერია (19 წლის), რომელმაც მთავარი ევროტურნირის ფინალური მატჩი ძირითად შემადგენლობაში დაიწყო. კიდევ ერთი თინეიჯერი, რომელმაც ფინალი პირველივე წუთიდან ითამაშა, იოჰან ნეესკენსი იყო და ეს 1971 წელს, ჩემპიონთა თასის გადამწყვეტ მატჩში (აიაქსი V პანათინაიკოსი) მოხდა.

იურგენი კმაყოფილია!
ტაიმის პირველ ნახევარში თავისი ფეხბურთელების თამაშით კლოპი კმაყოფილია. ლივერპული რეალს არაფრის საშუალებას არ აძლევს და საკმაოდ სახიფათოდაც უტევს

ცუდი ამბავი: სალაჰი გავიდა!
ძალიან ცუდი ამბავი ლივერპულისთვის: მოჰამედ სალაჰმა სერხიო რამოსთან ორთაბრძოლაში მხრის დაზიანება მიიღო და თამაშს ვეღარ აგრძელებს! მის ნაცვლად კლოპმა მოედანზე ლალანა შეუშვა. სხვათა შორის: ჩემპიონთა ლიგის ამ გათამაშებაში რონალდოს 15 გოლი აქვს გატანილი და საუკეთესო ბომბარდირია, სალაჰს - 10 (თუ საკვალიფიკაციო ეტაპის პლეი ოფსაც ჩავთვლით, 11).

კარვახალიც დაშავდა!
იძულებითი ცვლილების გაკეთება ზიდანსაც მოუხდა: ტრავმირებული კარვახალის ნაცვლად მოედანზე ნაჩო გამოვიდა.

პირველი ტაიმი დასრულდა - 0:0


პირველი ტაიმის მოკლე შეფასება
სანამ სალაჰი ტრავმას მიიღებდა, ლივერპული უკეთ თამაშობდა, რეალს კი აშკარად პრობლემები ჰქონდა. ეგვიპტელის მოედნიდან გასვლის შემდეგ, ყველაფერი შეიცვალა: რეალმა უკეთ შეუტია და კლოპის გუნდს გაუმართლა, ტაიმი რომ არ წააგო

გოოოოოლ!!! რა გააკეთა კარიუსმა?!
კარიუსის საშინელი შეცდომა, მადრიდელები იგებენ! ლივერპულის მეკარემ რეალს გოლი აჩუქა!

გოოოოოლ!!! ლივერპულმა გაათანაბრა!
ლივერპულმა 55-ე წუთზე გაათანაბრა! მოწოდებული კუთხურის შემდეგ საჰაერო ორთაბრძოლა ლოვრენმა მოიგო, საბოლოო ზუსტი დარტყმის ავტორი კი სადიო მანე გახდა

გოოოოოოლ! გარეთ ბეილის შედევრი!!!
გარეთ ბეილის სასწაული! უელსელმა შედევრი გაიტანა! ეს ერთ-ერთი ულამაზესი გოლია ჩემპიონთა ლიგის ფინალების ისტორიაში!

გოოოოლ!!! 3:1
ისევ კარიუსის უპატიებელი შეცდომა და ბეილის დუბლი! რეალი ჩემპიონთა ლიგას ზედიზედ მესამედ იგებს! აი, ამიტომ ამბობს კლოპი თითქმის ყველა ინტერვიუში, რომ უკეთესი მეკარე სჭირდება.

скачать dle 11.3